Arrishaght Bates

She arrishaght noichraghagh ee Arrishaght Bates, as dooie meenieunagh er n'aafilley dy yannoo arrish er dooie nieunagh dys cur grayn er co-chragheyderyn y ghaa ghooie. Ta'n ennym eck er son y najooree Hostnagh Henry Walter Bates ren obbyr er arrishaght ayns keyljyn fliaghee^[noa] (rainforests) ny Brasseel.

She saase smoo cadjin as share er fys arrishaght t'ayn; myr shen, ta sleih toiggal "arrishaght" myr "arrishaght Bates" dy cadjin, agh ta saaseyn elley ayn, goaill stiagh arrishaght Müller as arrishaght chraghagh.

T'ad cur bun-hampleyr er y dooie nieunagh, arrishee er dooieyn elley ta jannoo arrish er, as moylleydee er dooieyn ta cur tastey da'n chowraghey oc as goll er moylley ec ny h-arrishee. Ta'n bun-hampleyr ceau bree as cooid er saaseyn coadee, myr sampleyr, nieu. Liorish jannoo ymmyd sheadaneagh jeh cowraghyn y dooie nieunagh, ta'n arrishagh cosney vondeish coadee ta cur grayn er cragheyderyn, gyn eeck y leagh coadee. Ta'n bun-hampleyr, chammah's y moylleydagh, surranse neuvondeish y volteyrys shen. Ta bree coadee ny nieu croghey er keeayll çhionnit y chragheyder: my t'eh soaieaghey er bun-hampleyr, ta drogh-vlass ny eiyrtys nieu cur er shaghney beiyn elley as y cowraghey cheddin oc 'sy traa ry-heet.

Ta feme er aaniartaghey y beoyn shen nish as reesht liorish prowal. My ta ram arrishee ayn, s'cosoylagh eh dy nee cragheyderyn soiaghey orroosyn ny keayrtyn gyn drogh-eiyrtys; t'ad gynsaghey nagh vel beiyn as y cummey shen oc gaueagh, as nee ad soiaghey er bun-hampleyryn chammah's arrishee. Chammah's shen, my ta menkid ny h-arrishee feer ard, ta trimmid mooar reihyssagh najooragh er cragheyderyn dy eddyraghey y ghaa ghooie, er y fa dy vel ram bee ry-gheddyn liorish shen. Myr shen, ta vondeish ny h-arrishee goll er mooghey dy tappee. Er ny binn shen, ta arrishee ny s'genney na bun-hampleyryn son y chooid smoo. Ta kuse jeu er n'aafilley caghlaaghyn cummey dys jannoo arrish er caghlaaghyn bun-hampleyr. Ta shen cur coadey s'troshey oc liorish reih fo venkid^[noa] (frequency-dependent selection).

She cragheyderyn ta bun y reih najooragh shoh ta caghlaa cummey ny h-arrishee dys cummey bun-hampleyr ennagh. Erreish daue blastyn cragh meevlasstal keayrt ny ghaa, nee ad shaghney ny ta gollrish my foddee eh. Nee eh shaghey y dooie nieunagh, as unnanee jeh dooieyn elley my t'ad gollrish; agh ta unnanee elley nagh vel gollrish goll er ee. Myr shen, ta unnanee y dooie blasstal ta gollrish y dooie nieunagh geddyn sliught as bishaghey.

Cha nee arrishaght hooilley t'ayn ayns dagh ooilley chooish, agh moylley keeayll erbee. Ta kuse dy lhemeenyn jannoo arrish er cowraghyn rauee feer-heeanagh ta lhemeenyn meevlasstal cur dys craitnagyn.